"Pródöktív" helgi að baki. Þeysti norður á Akureyri eftir hádegi á föstudaginn til að taka munnlegt próf í dönsku. Ætla hér með að hætta að afsaka dönskuna mína. Ég get alveg bjargað mér á dönsku og rúmlega það og hana nú. Er búin að fá staðfestingu hjá fagmanni.
Á föstudagskvöldið var svo innflutningsteiti í sveitinni hjá systur minni elskulegri. Ég átti von á einhverju smá "get-together" en ég held að hálf Eyjafjarðarsveitin hafi mætt á svæðið. Er líða tók á teitið, bolluna og bjórinn brutust menn út í söng og þá ekki einhverju svona gítarrauli heldur leið manni eins og á karlakórsæfingu. Ég er ekki vön þessu úr minni sveit. En þetta var fínt en mikið svakalega var ég þreytt í lok teitisins sem og daginn eftir. Er komin úr æfingu. Svo var það bara franskan í gær. Eilíf gleði.

Gerði góða reisu til höfuðborgarinnar um síðustu helgi. Heimsótti nokkra vel valda ættingja eins og Helgu frænku, afa og ömmu og vinkonurnar tvær. Var vel veitt í mat og drykk hvar sem ég kom. Fór hins vegar ekkert í IKEA, Rúmfatalagerinn eða Kringluna. Lét það nægja að taka stuttan rúnt í Smáralindinni og korters stopp í Bónus í Borgarnesi á leiðinni heim.

Hvað er þetta annars með vegakerfið í elsku höfuðborginni? Nú er svoldið síðan að ég hef keyrt eitthvað að ráði í Reykjavík og ég átti á stundum í vandræðum með að komast leiðar minnar. Eins og strætókerfið er nú ömurlegt þá þarf maður þar allavega vega ekki að hugsa um það hvernig maður kemst á leiðarenda heldur bara hversu langan tíma og hversu marga skiptingar milli vagna það tekur. Ég hef heldur aldrei verið hrifin af hringtorgum en það virðast skipulagsyfirvöld í Reykjavík vera, þetta helv... er alls staðar. Þegar ég var krakki og sá stórborgina í hyllingnum voru umferðaljós mikilvægur hluti aðdráttaraflsins, ekki hringtorg. Og svo ég haldi nú áfram að tuða, hvað er þetta með að geta ekki lengur treyst á áttaskynið? Ég man þegar ég var að "æra á Reykjavík". Já!! kom með reglulegu millibili. Bústaðarvegurinn er semsagt fyrir ofan Miklubrautina og svo kemur Kringlumýrabrautin þvert á.... En núna á ég að beygja til hægri í eitthvað hverfi sem ég veit alveg að er vinstra megin við mig. Beygja til vinstri af Snorrabrautinni þegar maður ætlar vestur í bæ?!? Keyrði líka nýju Hringbrautina. Hvað er málið?? Það er eins og maður sé skyndilega komin á einhverja ameríska hraðbraut eða risabílaplan, ljósastaurarnir eru meira að segja skrítnir. Þarna gefa allir í í smá stund og svo bara... gerist ekki neitt, allt verður eins og áður og maður andar léttar að vera komin í gamla vesturbæinn sinn en skilur enn minna í því en áður hvers vegna maður keyrði í smástund í Ameríku.

Og smá ábending fyrir ferðalögin í sumar. Mæli með því að stoppa í Víðihlíð frekar en Staðarskála ef leiðin liggur um Húnavatnssýslurnar. Víðihlíðarskálinn er síst subbulegri og hamborgararnir ódýrari, betur útilátnir og síðast ekki síst bragðbetri en brasið í Staðarskála. Líka færra fólk og svona.

Nóg komið af tuði, þarf að huga að því hvernig hryggnum líður í ofninum.