Kláraði að skrifa á föstudaginn og er núna svona í rólegheitum að lesa yfir, gera heimildaskrá og svona. Gerði ekkert í gær heldur fór bara í bæinn með Þórunni í góða veðrinu, sólin loksins farin að láta sjá sig í Álaborginni. Ætlaði nú reyndar bara að versla linsuvökva og krem og svona en endaði á því að kaupa líka sjal og jakka. Kvöldinu var svo varið í að spila pictionary þar sem mínir einstöku listrænu hæfileikar fengu að njóta sín. Það er allavega gott að geta komið fólki til þess að hlæja.

Mamma mín elskuleg átti afmæli í gær, 54 ára kerlingin. Ég stóð mig vel og sendi henni sms í tilefni dagsins fyrir hádegi eða um hálf tíu að hennar tíma. Stóð mig ábyggilega betur en hinn krakkinn. Í dag á ég svo skírnarafmæli held ég, 26 ár síðan Þóru nafninu var spyrt við mig og ég varð formlega meðlimur í þjóðkirkjunni. Man að ég var ekkert of sátt við Þóru nafnið þegar ég var krakki, fannst það stutt og ómerkilegt og ég hafði ekki einu sinni neitt seinna nafn. Í dag finnst mér þetta bara fínt nafn, stutt og laggott en alveg feikinóg.